Board Examination Routine

Thankyou!

प्रेस विज्ञप्ति

मिति–२०६९-०८-२४
काठमाडौँ डोन बस्को कलेजको आयोजनामा मलेसियास्थित सनवे विश्वविद्यालय भ्रमणसम्बन्धी एक अनुभव आदानप्रदान कार्यक्रम सम्पन्न भएको छ । बानेश्वरस्थित इन्द्रेनी कम्प्लेक्सको सभाहलमा आयोजित कार्यक्रममा संस्थाका कार्यकारी निर्देशक कपिलदेव रेग्मीले संस्थाका विगत र आगतबारे सङ्क्षेपमा प्रकाश पार्दै मन्तव्य राख्नुभएको थियो । भ्रमणका क्रममा हासिल गरेका अनुभव आदानप्रदान गर्ने क्रममा विद्यार्थीहरूले मलेसियाका शैक्षिक, सामाजिक, आर्थिक, राजनीतिक, सांस्कृतिक तथा पर्यटकीय स्थलहरूका बारेमा सचित्र सामग्री प्रदर्शन गरेका थिए  । दश दिवसीय उक्त अध्ययन–भ्रमणमा कलेजका विद्यार्थीहरू सहभागी थिए । अध्ययन–भ्रमणमा सहभागी कलेजका बिजनेस डेब्लपमेन्टका निर्देशक दिपाङ्कर सेर्पाले उक्त भ्रमणको निष्कर्षका बारेमा प्रकाश पार्नुभएको थियो ।
पूर्वाञ्चल विश्वविद्यालयका व्यवस्थापन सङ्कायका डीन प्रा.डा. श्याम कटवालको प्रमुख आतिथ्यमा सम्पन्न कार्यक्रममा मलेसियाली राजदूतवासका प्रतिनिधिले समेत आफ्नो मन्तव्य व्यक्त गर्नुभएको थियो । मन्तव्यका क्रममा दूतावास प्रतिनिधिले संस्थाले आफ्ना विद्यार्थीहरूलाई अन्तर्राष्ट्रिय स्तरका शैक्षिक कार्यक्रममा सहभागी गराएकोमा प्रसन्नता व्यक्त गर्दै यस्ता क्रियाकलापमार्फत् पुनः सहकार्य गर्ने वचनबद्धता व्यक्त गर्नुभएको थियो । कार्यक्रममा काठमाडौँ डोन बस्कोका एमबीए कार्यक्रम निर्देशक डा. महानन्द चालिसे तथा अर्थशास्त्री डा. चिरञ्जीवी नेपालले पनि मन्तव्य राख्नुभएको थियो । कार्यक्रम काठमाडौँ डोन बस्को कलेजका अध्यक्ष एवम् वरिष्ठ शिक्षाविद् प्रा.डा. मनप्रसाद वाग्लेको सभाध्यक्षतामा सम्पन्न भएको थियो ।
सभाध्यक्षको आसनबाट बोल्दै डा. वाग्लेले काठमाडौँ डोन बस्को कलेजले आगामी दिनहरूमा अन्तर्राष्ट्रिय स्तरमा ख्यातिप्राप्त विश्वका अन्य विश्वविद्यालयमा संस्थागत सहभागितालाई तीव्रता दिने धारणासमेत राख्नुभएको थियो । कार्यक्रममा सहभागी अधिकांश वक्ताहरूले काठमाडौ“ डोन बस्को कलेजको एमबीए तहमा अध्ययनरत विद्यार्थीहरू देशको व्यावसायिक क्षेत्रको नेतृत्व ग्रहण गर्न सक्षम हुनुपर्ने धारणा राखेका थिए । भ्रमणमा सहभागी विद्यार्थीहरूलाई प्रमाणपत्र तथा अतिथिहरूलाई मायाको चिनो प्रदान गरिएको थियो ।